Қан орталығында «Леди Донор-2025» байқауының жеңімпазы белгілі болды. Бұл атақ Қазақстанның құрметті доноры Анна Поповаға берілді.

Анна Станиславовна 35 жылдан бері тұрақты түрде қан тапсырып келеді. Осы уақыт ішінде ол көптеген марапаттар мен алғыс хаттарға ие болған. Донорлық жолын 1980-жылдары бастаған ол алғашында достарымен бірге «демалыс пен дәмді түскі ас үшін» барып жүргенін айтады. Алайда уақыт өте келе бұл игі іс оның өмірінің маңызды бөлігіне айналып, бүгінде ол Қазақстанның құрметті доноры атанды.

«Байқауға қатысқанда маған алтыншы нөмір берілді. Бұл – менің туған күнім, алтыншы қыркүйек. Өте қуанышты болдым! Қан тапсырып, адамдарға көмектесе алатыныма Құдайға шүкір! Өміріміздің әр күнін бағалайық», – деді Анна Попова.

Байқауға барлығы 28 әйел қатысты. Жеңімпаз кездейсоқ сандар генераторы арқылы анықталды. Ол Трансфузиология ғылыми-өндірістік орталығының Басқарма төрағасының алғыс хаты мен жарнамалық өнімдер жиынтығы салынған рюкзакқа ие болды.

Қан орталығы өкілдерінің айтуынша, бұл байқауда жеңілгендер жоқ. Барлық қатысушылар – жеңімпаз, өйткені әрқайсысы шын мәнінде баға жетпес игі іс жасады!

Байқауға қатысушылардың барлығы алғыс хаттар мен естелік сыйлықтармен марапатталды.